حسبى الله ونعم الوكيل
هواية اللى حصل للناس
حتى السرقة بقيت ف بيوت ربنا
وانا بزور المدرس بتاعى اللى كنت باخد عندة درس وانا ف ثانوى العصر اذن والراجل قالى يالا نصلى ف الجامع قلتلة ومالة
المهم رحنا الجامع هو دخل يتوضا وانا دخلت الصلاة علطول عشان كنت متوضى جاهز
الجامع مساحتة صغيرة اللى بيصلوا كلهم لا يتجاوزوا ال20 كان صف اول والصف التانى فية بتاع 3او4 انا منهم وصف الاطفال الصغيرة ف الاخر
دخلت الصلا ف اخر الركعة الاولى وخلصت بعد اما الناس خلصت وبعدين قمت عشان اخرج وادور ع اللامؤاخذة الشبشب بتاعى ملقتوش!!!
الله انا كنت حاطة هنا
طب يمكن حد اتلخبط فية ولبسة مكان شبشبة ؟ بس مفيش ولا شبشب من اللى موجودين ف الجامع شبهة
يخرب بيت كدة طب هروح ازاى دى المسافة من الجامع لحد بيتنا مشوار جامد!
شوية ولقيت راجل كبير واقف ومحتار نفس حيرتى وبيبص ع الجزامات
اية دة مش انا لوحدى يعنى !كدة مش واحد بقى اللى بيسرق دى عصابة !
وانا ف حيرتى دى وعمال اضرب اخماس ف اسداس الراجل شيخ الجامع لقيتة بيقولنا انا والراجل اللى اتنشل زى بصوا كدة فى شباشب جوة ف الحمام !
الراجل بص لقا شبشبة وانا كمان قلت اشوف كدة لقيت شبشبى انا كمان
يعنى البعيد اللى خدة عشان يخش بية الحمام مش شايف الشباشب بتاعة الحمام جوة موجودة ؟دانا قلت كدة بينى وبين نفسى بس يظهر الشيخ قرا افكارى راح باصصلى وقالى
يابنى اما تبقى تيجى تصلى بعد كدة ابقى شوفلك شبشب قديم شوية عشان دة العين هتبقى علية
واستكمل قائلا
تلاقى اللى كان عاوز يسرقة دخلة الحمام بحيث يعمل انة داخل يعمل حمام ويعبية وهو خارج بس حس ان حد واخد باله او ملحقش عشان كدة الشبشب تانة مكانة لان الحكاية دى كانت بتحصل كتير
اه ياولاد ال.......... دة اللى كنت بقول كدة بعد اما خرجت من الصلاة
ولغاية دلوقتى عمال اقول اه ياولاد ال.....................ياللى مبتراعوش حرمة بيوت الله
هو احنا هنلاقيها من الحرامية الكبار ولا هنلاقيها من حرامية الشباشب ف الجوامع
اه يانا يامفقوع !
No comments:
Post a Comment